مشاريع متعثرة.. مشروع المحرقة
موعدنا مع مشروع المحرقة يا شباب.. أنواع المشاريع بتركز على وين مصدر المشكلة.. علشان نحاول نتلافاها سواء بالمهارات التقنية أو بالمهارات الشخصية.. وكذلك الأمور الي ممكن نتلافاها من قبل مفهوم إنه التخطيط الصح بيحل و التحليل الصح بيحل، بس البوستات برضو موجهة للي أوريدي اتورط.. إيش يعمل؟ كيف ممكن يحل؟
مشروع واتفقنا عليه، أموره تمام، كلشي ألف الألف، بدينا نشتغل ومشينا ولما بدينا نعرض عالزبون أول بيتا.. طلع الـ domain غير عن الي انت كنت متصوره والعمليات مش زي ما انت كنت متخيلها، يعني انت غلطت في فهمك وتحليلك وتنفيذك! بس حضرتك قررت تكمل وتحاول تفهم وتصلح فهمك (هنا الغلط صاروا غلطين).. صار المشروع محرقة حقيقية للوقت والجهد، كل البدجت تبعته صارت مخسر بحت، (صار الهم عليك همّين).. تأخر التسليم والزبون منكد عليك عيشتك، وانت بطلت حتى قادر تاخد شغل جديد من ورا هادا المشروع المزعج.
ما بدنا ننكر انو الغلط غلطك هنا من البداية، إنك ما كنت بالحصافة الكافية إنك تعرف قديش الـ domain الي انت خاشش عليه معقد أو انت لسا ما وصلت الخبرة الكافية لتحليل هيك دومين، لكن برضو هادا نزيف ولازم يوقف – يعني بينفعش تواصل وتغرق وتغّرق الناس معك، شخصياً أنا ممكن إما أقعد مع الزبون أقوله نعمل إعادة تقييم شاملة لكلشي ونحط تحليل من جديد ونبدا صح وكأنه مشروع جديد وأعوضه بديسكاونت، أو باعتذر عن المشروع كله وبرجع كل فلس أخدته من الزبون وبعطيله السورس كود الي كتبته لحتى الآن كمان، آه يخو..
الخلاص هنا غنيمة وانت محقوق.. وبدك تحاول تغري الزبون إنه يعتقك لو ما قبل إنه يعيد التقييم.
ومش حقولك انت زلمة والتزمت بكلمة ولازم تكمل وانت ساكت.. لأنه برضو انت لازم تواصل لو انت واثق إنك بتقدر تطلع بالإشي لبر الأمان ما تحرق وقت الزبون بزيادة وتخرب دياره بزيادة. يمكنك النقر هنا لمشاهدة المنشور.
**المقالات والآراء المنشورة تعبر عن رأي أصحابها، ولا تعبر بالضرورة عن رأي باتريك تكنولوجي – تميز باللون أو تنسيق /مع كل مشروع
و يسعدنا استقبال مشاركاتكم ومقالاتكم لنشرها في المدونة من خلال التواصل معنا عبر الإيميل: [email protected]
أو واتس أب: 972593201501+
